4 teams bakbakan para sa 2 Finals slot
MANILA, Philippines — Apat na koponan ang magbabakbakan para sa dalawang silya sa finals sa pagpalo ng 2019 Philippine Superliga Invitational Conference ngayong hapon sa Malolos Sports and Convention Center sa Bulacan.
Haharapin ng Petron ang Foton sa alas-3 habang magtutuos naman ang F2 Logistics at Cignal sa alas-5.
Winalis ng Blaze Spikers ang eliminasyon tangan ang imakuladang 6-0 rekord.
Ngunit ibang usapan na ang semis.
At ayaw ng Petron na maulit ang masaklap na nangyari sa kanila sa All-Filipino Conference kung saan hawak nito ang twice-to-beat card ngunit natalo pa rin sa Cignal.
Masakit pa rin para kay setter Rhea Dimaculangan ang nangyari pero marami silang natutunan sa naturang karanasan.
“We are still licking that old wound. We learned our lesson the hard way last conference. So we will play in the semifinals and try our best to make sure it won’t happen again,” ani Dimaculangan.
Babanat para sa Blaze Spikers sina Sisi Rondina, Aiza Maizo-Pontillas, Ces Molina at Denden Lazaro.
Kailangang tapatan ng Foton ang intensidad ng Petron.
Sa kabilang banda, mamanduhan ni Filipino-American spiker Kalei Mau ang ratsada ng Cargo Movers kasama sina Ara Galang, Kianna Dy, Aby Maraño at Majoy Baron.
Hindi magiging madali ang daang tatahakin ng F2 Logistics dahil nagtataglay din ang Cignal ng matikas na lineup.
Sasabak para sa HD Spikers sina Rachel Anne Daquis, Jovelyn Gonzaga, Mylene Paat at Alohi Robins-Hardy na may malalalim na ring karanasan.
- Latest
