Motolite asam ang krusyal na panalo
MANILA, Philippines — Isang krusyal na panalo ang sisikaping makuha ng Motolite sa pagsagupa nito sa BaliPure ngayong hapon sa pagpapatuloy ng 2019 Premier Volleyball League Open Conference sa The Arena sa San Juan City.
Nag-uumapaw ang kumpiyansa ng Power Builders matapos gulantangin ang Reinforced Conference champion PetroGazz noong Miyerkules sa pamamagitan ng 22-25, 25-13, 25-16, 16-25, 15-11 desisyon.
Kaya naman umaasa ang Motolite na madadala nito ang magandang momento laban sa BaliPure sa kanilang duwelo sa alas-2.
Hawak ng Power Builders ang 8-5 marka.
Kailangan nito ang panalo para dumikit sa No. 3 BanKo Perlas na may 9-5 baraha at mapalakas ang tsansa sa semis.
Tanging Creamline pa lang ang nakasisiguro ng puwesto sa Final Four matapos kumulekta ng impresibong 12-0 kartada.
Nasa ikalawa naman ang PetroGazz na nagtataglay ng 9-3.
Papalo para sa Power Builders sina University of the Philippines aces Isa Molde at Diana Mae Carlos na pangunahing pinagkukunan ng puntos ng tropa.
Umaasa rin ang Motolite na muling puputok si top hitter Myla Pablo gayundin si reserve wing spiker Bernadeth Flora na tunay na maaasahan sa oras na hinuhugot ito sa bench.
- Latest