Injury ni Irving natiwasan, apan Nets midaog gihapon sa Lakers

CEBU, Philippines —  Si Kyrie Irving mibayi og liboan ka milya aron moduwa sud lamang sa 66 segundos.

Kini human ang All-Star guard nabalikan sa iyang injury sa nawong atol sa iyang pre-season debut uban sa Brooklyn Nets nga mipilde sa Los Angeles Lakers, 114-111 sa pasiunang dalit sa duha ka NBA China Games series niadtong Huwebes sa gabii didto sa Shanghai.

Miduwa si Irving bisan og duna pa'y gihambin nga injury sa walang bahin sa iyang nawong nga iyang nahiaguman atol sa usa ka pick-up sa miaging bulan, apan natiwasan kini human maigo sa braso ni Rajon Rondo sa nakaon pa lamang nga 1:06 sa duwa.

Si Spencer Dinwiddie nga maoy mihulip ni Irving, maoy nangu sa Nets uban ang 20 puntos, samtang si Taurean Prince midugang og 18 puntos.

Nangu sa Lakers mao si LeBron James nga mikadlit og 20 puntos. Sila si Rondo ug Anthony Davis nagkumbinar og 34 puntos sa pilderong Lakers.

Didto sa Tokyo, Japan, sila si Russell Westbrook ug James Harden mipakita dayon sa kabangis sa ilang kombinasyon human mitali og 22 puntos matag usa aron pangulohan ang Houston Rockets ngadto sa 118-111 nga kadaogan batok sa defending champion Toronto Raptors.

Dako sab og natampo si Eric Gordon sa Rockets uban ang 14 puntos.

Si Norman Powell mibahog og 22 puntos sa pilderong Raptors nga nakakuha sab og 16 puntos gikan ni Pascal Siakam ug 10 puntos ug 10 ka assists gikan ni Fred VanVleet.