Cignal ikinasa ang semis
Laro Bukas (Caloocan Sports Complex)
2 p.m. – Cignal vs Petron
4 p.m. – F2 Logistics vs Generika-Ayala
6 p.m. – Marinerang Pilipina vs PLDT
Pinasadsad ng Cignal ang PLDT Home Fibr, 25-22, 25-19, 25-20 para masungkit ang unang silya sa semifinals ng 2019 Philippine Superliga Invitational Conference kahapon sa Malolos Sports and Convention Center sa Bulacan.
Mabilis na napatumba ng HD Spikers ang Power Hitters sa likod ni national team stalwart Mylene Paat para kubrahin ang ikalimang sunod na panalo ng Cignal.
Humakot si Paat ng 18 puntos mula sa 14 attacks, tatlong blocks at isang ace kasama ang walong digs habang umariba rin sina wing spikers Rachel Anne Daquis at Janine Navarro ng tig-13 hits para sa HD Spikers.
Nagpasiklab naman si Filipino-American playmaker Alohi Robins-Hardy na may 19 excellent sets at limang puntos gayundin si libero Jheck Dionela na may 13 digs at anim na excellent receptions.
“We can’t afford to relax, knowing that we are still unbeaten. We need to learn how to avoid being complacent in the last stretch of this conference. We also have to be consistent every time,” ani Paat na bahagi ng national team na sasabak sa 2019 Southeast Asian Games sa Nobyembre.
Nanguna para sa Power Hitters si Far Eastern University standout Jerrili Malabanan na umiskor ng 15 points habang gumawa naman si Shola Alvarez ng 12 markers, 10 digs at siyam na receptions.
Dahil sa talo, nanganganib masibak ang PLDT na laglag sa 1-3 card.
- Latest