Zion mikadlit 29 puntos
CEBU, Philippines – Gipamatud-an ni super rookie Zion Williamson nga angayan gyud siyang mahimong no. 1 pick sa NBA dihang iyang gipangulohan ang New Orleans Pelicans aron makaipsot sa Chicago Bulls, 127-125 sa pre-seasons kagahapon didto sa United Center sa Chicago, Illinois.
Si Williamson miiskor og 29 puntos sud sa 27 minutos niya nga pagduwa. Milangkat sab siya og upat ka rebounds ug upat sab ka assists.
Gipahilom ni Williamson nga sayop ang mga kritisismo batok kaniya dihang gipakita niya nga mosalir gihapon iyang agresibong dinuwaan batok sa depensa sa mga NBA players sama sa iyang gibuhat dihang niduwa pa siya sa kolehiyo.
Gibiyaan ang New Orleans sa iskor nga 86-107, apan sila si Williamson ug Jahlili Okafor nagkumbinar og mga puntos aron pagpabangon sa Pelicans.
Si Okafor mitapos og 12 puntos, samtang sila si Frank Jackson ug kanhi All-Star Jrue Holiday mitampo'g 11 ug 10 puntos.
Ang Bulls gipangulohan ni Zach Lavine nga midaro sab og 29 puntos.
Sa laing bahin, ang Detroit Pistons mitiklo sa Dallas Mavericks, 125-117 luyo sa paningkamot ni Derrick Rose nga mibugna og 18 puntos.
Sa ubang mga duwa, ang Orlando Magic mibihag sa Atlanta Hawks sa iskor nga 97-88, ang Miami Heat mipakaging sa Charlotte Hornets, 108-94 ug ang Milwaukee Bucks milubong sa Utah Jazz sa iskor nga 133-99.
- Latest