Romeo gisilotan sa PBA

CEBU, Philippines – Bag-o pa lang gani gisugdan ang Governors' Cup, apan ang PBA Commissioner's office mipahamtang dayon og silot ngadto ni Terrence Romeo sa San Miguel Beermen.

Kini gumikan kay si commissioner Willie Marcial wala kauyon sa gihimong pag-headbutt ni Romeo ngadto sa guwardiya sa NLEX Road Warriors nga si Philip Paniamogan  atol sa ilang duwa didto sa Dubai   niadtong Oktubre 4.

Ang star point guard sa San Miguel nga si Romeo gipamulta og P20,000.

Nakita sa camera nga si Romeo mikalit og headbutt ni Paniamogan sa final period dihang nagkalambod sila atol sa usa ka play. Gipagawas sa korte si Romeo, apan midaog gihapon ang San Miguel.

Sa laing bahin, gipaabot pa ang silot nga ipahamtang ni Marcial ngadto ni Rain or Shine center Beau Belga tungod pagsiko sa liog ni Jason Perkins sa Phoenix  Fuel Masters atol sa ilang duwa niadtong Miyerkules.