Warriors, Panthers magtakus pag-usab

CEBU, Philippines – Ang University of San Carlos (USC) Warriors ug University of Southern Philippines Foundation (USPF) Panthers dunay managlahing katuyoan sa ilang panag-abot og usab sa 19th Cebu Schools Athletic Foundation, Inc. (CESAFI) men's basketball tournament karong adlawa diha sA Cebu Coliseum.

Sa alas-6:45 sa gabii nilang kuwentro, ang Warriors naglaraw nga  lawgan og laing kapildihan ang Panthers, apan angayan silang mangandam sa laing dako nga misyon.

Kini gumikan kay ang Warriors nanginahanglan pa og dugang singko minutos sa wala pa nila ihawa ang Panthers, 80-75 sa unang hugna sa eliminasyon niadtong Septiyembre 1.

Gawas niini, ang Warriors angayan gyud nga magmatngon gumikan kay ang Panthers naglungot-lungot man nga makabawi sa duha ka sagunson nga pilde nga ilang natilawan sa mga kamot sa University of San    Jose-Recoletos  (USJ-R Jaguars) ug three-time defending champion University of the Visayas (UV) Green Lancers.

Sa kasamtangan, ang Warriors nag-inusara sa ikatulong dapit sa seniors division standings uban ang 4-3 win-loss record, samtang ikalima ang Panthers bitbit ang 3-5 nga baraha.

Sa laing bahin, ang University of Cebu Lapu-Lapu and Mandaue (UCLM) Campus ug ang Cebu Institute of Technology-University (CIT-U) Baby Wildcats mag-abot sa nangiwit nga mga teams sa juniors division sa alas-5:15 sa hapon.

Ang Baby Wildcats nasagunsonan og lima ka pilde human midaog sa una nilang duwa, samtang ang UCLM bokya pa gihapon sud sa upat ka duwa.