Rockets mitipi sa Clippers

CEBU, Philippines — Bisan  og usa ra ka pre-season game, apan  si James Harden mipakita dayon nga seryoso siya nga modominar sa liga sunod season dihang iyang gipangulohan ang Houston Rockets ngadto sa 109-96 nga kadaogan batok sa Los Angeles Clippers kagahapon didto sa Sheriff Center sa Hawaii.

Si Harden miposa og 37 puntos nga iyang gihimo sud lang sa tulo ka kuwarter. Wala na miduwa si Harden sa final period human milabaw og 24 puntos ang Rockets.

Mibida usab ang sentrong si Clint Capela nga mirehistro og 14 puntos ug 11 ka rebounds. Wala hinuon miduwa ang bag-ong star sa Rockets nga si Russell Westbrook kay gipapahuway una ni coach Mike D'Antoni.

Ang Clippers ni coach Doc Rivers wala hinuon maalarma sa maong kapildihan tungod kay wala miduwa ang duha nila ka bag-ong star tandem nga sila si Kawhi Leonard ug Paul George nga igo rang mitan-aw sa bench.

Nangulo sa Clippers si Montrezl Harell  nga adunay 17 puntos, samtang si Rodney McGruder adunay 12 puntos.

Ang duwa sa Rockets ug Clippers maoy opisyal nga mibukas sa NBA pre-season.