Donaire adto mag-training sa Manila

CEBU, Philippines — Si WBA 'Super' bantamweight champion Nonito 'The Filipino Flash' Donaire Jr. moadto sa Manila aron ipahigayon ang katapusang hunat sa iyang pagbansay-bansay alang sa giatngan nilang away ni WBA/IBF unified champion Naoya Inoue karong Nobiyembre 7 didto sa Super Saitama Arena sa Japan.

Segun sa taho ni Quinito Henson sa The Philippine STAR, igsuong mantalaan sa Banat News, si Nonito uban sa iyang asawa nga si Rachel ug duha nila ka anak maabot sa kaulohan karong Oktubre 20.

Ang 36-anyos nga si Donaire adto mag-training sa usa ka gym sa Alabang ubos sa superbisyon sa iyang amahan nga si Nonito Sr.

Ang ilang chief trainer nga si Kenny Adams adto na makigtagbo kanila sa Saitama.

Ang away nilang Donaire ug Inoue maoy finals sa World Boxing Super Series (WBSS). Mao kini ang modesider kon kinsay angayan nga makapanag-iya sa makasaysayanong Muhammad Ali trophy.

Si Donaire miabante sa finals human gipatikangkang sila si Ryan Burnett sa Belfast ug Stehpon Young sa US, samtang si Inoue milahutay ngadto sa championship round human gipalukapa sila si Juan Carlos Payano sa Dominican Republic ug Emmanuel Rodriguez sa Puerto Rico.

Si Donaire nagkupot og 40-5 win-loss record uban ang 26KOs, samtang ang 26-anyos nga si Inoue wala pa'y pilde sa 18 ka away ug 16 sa mga biktima niini iyang gipakatug mao nang gibansagan siya nga 'The Monster'.