Ramirez tiwala sa kakayahan ni Hidilyn

MANILA, Philippines — Malaki ang kumpiyansa ni Philippine Sports Commission chairman at Chef De Mission William ‘Butch’ Ramirez sa magiging kampanya ni lady weightlifter Hidilyn Diaz sa darating na 30th Southeast Asian Games at sa 2020 Olympic Games.

Bumisita si Diaz, ang silver medalist noong 2016 Olympics, sa opisina ni Ramirez kahapon para sa isang courtesy call sa PSC Building sa Rizal Memorial Sports Complex.

Bumuhat si Diaz ng dalawang bronze medal sa sinalihang IWF World Weightlifting Championships sa Pattaya, Thailand.

Inangkin ni Diaz ang nasabing dalawang tansong medalya sa women’s 55kg division mula sa combined weight na 214kg sa snatch at sa clean and jerk categories.

“Para sa akin, gold medal iyon,” sabi ni Ra­mirez sa tsansa ni Diaz para sa gintong medalya sa 2019 SEA Games.

Kailangan pa niyang sumabak sa dalawang torneo para makatiyak ng tiket sa 2020 Tokyo Olympics.

“The government will continue to give its utmost support for Hidilyn and all our competing athletes in the Southeast Asian Games,” sabi ni Ramirez sa 28-anyos na si Diaz.

Tinanggap ni Ramirez sa kanyang opisina ang three-time Olympian na si Diaz kasama si Samahang Weightlifting ng Pilipinas (SWP) president Monico Puentevella at ang national weightlifting team.

Tiniyak ni Ramirez kay Diaz na susuportahan ng sports agency ang lalahukan niyang tatlong qua­lifying competitions para sa 2020 Olympics.