Marcial susuntok ng ginto vs Russian pug

MANILA, Philippines — Nakahirit ng puwesto sa finals si dating AIBA World Junior Championship gold medalist Eumir Felix Marcial sa men’s middleweight (75 kgs.) division ng 2019 AIBA World Boxing Championships na ginaganap sa Yekaterinburg, Russia.

Agad na inilatag ni Marcial ang buong lakas nito para gapiin si third seed Kulakhmet Tursynbay ng Kazakhstan sa pamamagitan ng 5-0 unanimous decision win sa semifinals.

Sa katunayan, nagawa pang patumbahin ng two-time Southeast Asian Games champion ang Kazakh fighter sa first round nang pakawalan nito ang solidong kumbinasyon.

Subalit nakabangon pa si Tursynbay para makalusot at maipagpatuloy ang laban.

Dominado ng 23-anyos Pinoy pug ang laban para makuha ang 30-26, 30-27, 29-28, 29-27, 29-27 desisyon sa lahat ng mga hurado.

Haharapin ni Marcial sa gold-medal match si eighth seed Bakshi Gleb ng Russia na nagsumite ng 4-1 split decision win (30-27, 30-27, 29-28, 29-28, 28-29) kay fifth seed Herbert Da Conceicao Sousa ng Brazil.

Makasisiguro na si Marcial ng pilak na medalya para malampasan ng Pilipi­nas ang one-bronze medal finish nito noong 2015 edisyon mula kay Rio Olympics veteran Rogen Ladon.

Mula sa 78 bansang kalahok sa taong ito, siyam na bansa lamang ang nakapasok sa finals.

Pinakamarami ang Uzbekistan na may apat na boksingero sa championship round habang may tatlo naman ang host Russia.

Masaya si Association of Boxing Alliances of the Philippines (ABAP) president Ricky Vargas sa preparasyon ng national bo-xing team para sa Olympic Games at Southeast Asian Games.

“This is a happy deve­lop­ment for our preparations for the SEA Games and the Olympics. We wish Eumir well and hope for a favorable outcome. I congratulate the coaching staff for their outstanding work and I would like to make special mention of the support of the Philippine Sports Commission for making our participation in this World Championships possible,” ani Vargas.