Didal swak na sa semis
MANILA, Philippines — Lusot na sa semifinal round ng Street League Skateboarding (SLS) Global qualifier si Margielyn Didal nang magtapos ito sa ikawalong puwesto sa women’s division quarterfinals ng torneo kahapon sa Sao Paulo, Brazil.
Nakalikom ng kabuuang 11.1 points ang Pinay skateboard prodigy sa limang tricks na ginawa nito para makasama sa top 20 na didiretso agad sa semifinal round ng kasama ang Top 4 rank pros.
Dinaig ng 2018 Asian Games gold medalist ang ilang Brazilians, Hapones at Amerikanong skateboarder nang alpasan niya ito at tumapak sa top 10.
Makakaharap ni Didal sa semis round ang mga pambato ng Japan, The Netherlands, China, Brazil at Amerika at kinakailangan niyang makalusot sa top 18 para umabante sa Finals.
Ang paglahok ni Didal sa torneong ito ay isang paraan para makaipon ng Olympic points at paghahanda na rin sa pagsabak nito sa 30th Southeast Asian Games ngayong taon.
- Latest
