Batang Pier laban sa Painters; Aces kontra sa Dyip
MANILA, Philippines — Mga balik-imports ang ipaparada ng NorthPort at Rain or Shine, habang mga bagong mukha ang itatampok ng Alaska at Columbian.
Sasagupain ng Batang Pier ang Elasto Painters ngayong alas-7 ng gabi matapos ang upakan ng Aces at Dyip sa alas-4:30 ng hapon sa pagbubukas ng 2019 PBA Governor’s Cup sa MOA Arena sa Pasay City.
Tinapik ng NorthPort si Mychal Ammons na dating naglaro para sa TNT Katropa noong 2016 at nagposte ng mga averages na 14.75 points, 12.9 rebounds at 1.5 blocks sa kanyang 12 laro.
Itatapat naman ng Rain or Shine si Joel Wright, huling kumampanya para sa Star (ngayon ay Magnolia).
Kumolekta si Wright ng mga averages na 28.4 points, 14.5 rebounds, 2.7 assists, 1.8 steals at 1.4 blocks sa pitong laro niya para sa Hotshots dalawang taon na ang nakakalipas.
Sa unang laro ay itatampok naman ng Aces ang bagong head coach na si Jeffrey Cariaso, pumalit kay Alex Compton, bukod pa sa mga bagong hugot na sina Fil-Nigerian guard Maverick Ahanmisi at Fil-Am forward Abu Tratter.
Sina Ahanmisi at Tratter ay nakuha ng Alaska mula sa trade sa Rain or Shine at Blackwater.
Pumasok din sa trade ang Dyip kung saan nila nahugot sina guard Juami Tiongson at big men Lervin Flores at Joseph Gabayni.
Itatapat ng Aces si Justin Watts laban kay Khapri Alston ng Dyip.
Samantala, tinalo ng Tropang Texters ang Niigata Albirex Basketball, 99-90, sa East Asia League Terrific 12 sa Macau kahapon.
- Latest