Cebu Sharks miputol sa tulo sunod-sunod nilang pilde
CEBU, Philippines – Naputol ang tulo ka sunod-sunod nga pilde sa Casino Ethyl Alcohol-Cebu Sharks human midaog sa Zamboanga Family's Brand Sardines, 74-70 sa 2019 Maharlika Pilipinas Basketball League (MPBL) Lakan Cup niadtong Miyerkules sa gabii didto sa San Andres Sports Complex sa kaulohan.
Si William McAloney maoy bida sa mahinungdanong daog sa Sharks nga nakapainat sa ilang rekord ngadto sa 5-8.
Sulagma kaayong si McAloney ra sab ang naka-double figures sa Sharks uban ang 28 puntos human mipasud og 11 sa 15 niya ka itsa.
Ang Fil-Australian nga sentro milangkat sab og walo ka rebounds, duha ka assists, duha ka steals aron hatagan si Nonoy Falcasantos sa labing una niining daog isip head coach sa Sharks.
Sa sayong bahin sa duwa, ang Sharks na-alkansi og otso puntos, 6-14, apan miresbak pinaagi sa 36-24 rally aron ilogon ang labaw, 42-38 padung sa fourth quarter.
Human mipasud sa iyang lay-up nga nakahatag sa Cebu sa kinadak-an niining labaw, 64-53 sa oras nga 2:06, si McAloney mituldok sa tibuok duwa niyang pagkamabayanihon pinaagi sa paglansang og duha ka free throws nga maoy nagsilyo sa kalamposan sa Sharks, 74-64 sa nahibiling 10 segundos sa duwa.
- Latest
