SBU lalapain ang ika-12 dikit vs JRU
MANILA, Philippines — Target ng three-peat champion San Beda Red Lions ang pang-12th panalo at mapanatili ang malinis na kartada kontra sa Jose Rizal Heavy Bombers ngayon sa pagpapatuloy ng Season 95 NCAA basketball tournament sa The Arena sa San Juan City.
Haharapin ng Red Lions (11-0) ang Heavy Bombers (4-7) sa alas-2 ng hapon at susundan ng pagtatagpo ng Arellano Chiefs (2-9) at Perpetual Help Altas (3-7) sa alas-4 ng hapon.
Inaasahang magtatagumpay ang Heavy Bombers na kanila ring tinambakan, 74-52 sa first round ng elimination noong Hulyo 12 sa pangunguna ni James Canlas sa kanyang 17 puntos at walong rebounds.
Bukod kay Canlas, sasandal din si coach Boyet Fernandez kina Clint Doliguez, Evan Nelle, AC Soberano, Franz Abuda at Donald Tankoua.
Kung magtatagumpay ang Mendiola-based team kakapit sila sa dalawang laro na lamang para masiguro ang pagpasok sa Final Four dahil mahigit 14 wins ang magic number sa semifinal round.
Sa kabilang banda, kailangan naman ng Heavy Bombers ang panalo upang lumapit sa top four ng standing. Nananatiling buhay ang pag-asa ng JRU para sa playoff round, ngunit kailangan na nilang humataw para umakyat sa pang-anim na puwesto.
Sa juniors division, target ng nangungunang SBU Red Cubs ang pang-11th panalo sa sagupaan kontra sa JRU Light Bombers (6-5) sa alas-10 ng umaga at magtatagpo rin ang Arellano Braves (5-6) at UPHSD Junior Altas (5-5) sa alas-12 ng tanghali.
- Latest