NBA title kulang sa karera ni Harden
CEBU, Philippines – Gusto na gyud ni Houston Rockets superstar James Harden nga makatilaw og NBA title nga maoy iyang kulang aron masemento iyang legasiya isip usa sa mga labing ngilngig nga player sa kasaysayan.
Ang kanhi MVP nga si Harden nagkanayon nga iyang edad nga 30-anyos, nakadawat na siya og dagkong pasidungog sa NBA, apan aduna gihapo'y haw-ang tungod kay pabiling iglas kaniya ang NBA championship.
Si Harden gisusama na usab nila ni Michael Jordan, Kobe Bryant ug Dwyane Wade isip mga labing maayong shooting guard sa kasaysayan sa NBA. Apan alang ni Harden dili pa siya angay kay wala pa siya'y korona.
Masaligon hinuon si Harden sa ilang tsansa sa sunod season sa NBA ilabi na nga ikatimbang na niya ang laing kanhi MVP nga si Russell Westbrook. Gawas nga anaa sa Rockets ang duha ka banggiitang scorers sa liga, wala na usab ang babag nga Golden State Warriors kay nawad-an kini og usa ka haligi nga si Kevin Durant.
Giangkon hinuon ni Harden nga hagip-ot gihapon ang dalan paingon sa NBA finals ilabi na sa Western Conference tungod sa pagsulbong sa Los Angeles Lakers nila ni LeBron James ug Anthony Davis ug LA Clippers nila ni Kawhi Leonard ug Paul George.
- Latest
