Fajardo igigiya ang San Miguel vs Zhenshen

TNT, Blackwater sasabak din sa Macau tourney

MANILA, Philippines — Matapos ikampanya ang Gilas Pilipinas sa 2019 FIBA World Cup ay dadalhin naman ni five-time PBA MVP June Mar Fajardo sa kanyang mga balikat ang San Miguel sa Terrific 12 tournament sa Macau.

Sasagupain ng Beermen ang Zhenshen Aviators ngayong alas-7 ng gabi matapos ang upakan ng TNT Katropang Texters at Liaoning Flying Leopard sa alas-5 ng hapon sa Tap Seac Multi-Sports Pavilion.

Ang bawat koponan ay pinapayagang magparada ng dalawang imports para sa nasabing torneo na nilahukan ng siyam na tropa mula sa Chinese Basketball Association (CBA), Korean Basketball League (KBL) at J League ng Japan.

Bukod kina Fajardo, Arwind Santos, Alex Cabag­not at Terrence Romeo ay itatampok din ng San Miguel sina imports Desmine Wells at Lester Prosper.

Ibabandera naman ng Zhenshen si 7-foot-2 Li Mihao, dating miyembro ng Chinese national team at sina Pierre Deshawn at dating NBA player Shabazz Nagee Muhammad.

Kasama ng Beermen sa Group B ang Aviators at nagdedepensang Ryukyu Golden Kings.

Samantala, sina dating NBA player KJ McDaniels at one-time Mighty Sports reinforcement M­cKenzie Moore ang aasahan ng Tropang Texters sa pagharap sa title contender na Liaoning Flying Leo­pards.

Itatampok ng Leopards, dating CBA champions, sina Chinese national team members Guo Ailun at Zhao Jewel, naglaro sa 2019 FIBA World Cup, katuwang sina dating NBA players Lance Stepheson at Salah Mejri.

Nasa Group D ang TNT Katropa, Liaoning at Nigata Albirex Basketball at ang Group C ay kinabibilangan ng Zhejiang Guansgsha Lions, Utsunomiya Brex at Jeonju KCC Egis.

Sa unang laro sa alas-3 ng hapon ay makakatapat ng Blackwater ang two-time KBL champion na Seoul SK Knights.

Tinapik ng Elite sina Marqus Blakely at Alex Stepheson at itatapat ng Knights sina Aaron Haynes at Jameel Warney, dating naglaro sa NBA para sa Dallas Mavericks.

Nasa Group A ang Blackwater at Seoul SK kasama ang Chiba Jets.

Ang top two team sa bawat grupo ang papasok sa semifinals kung saan madedetermina ang maglalaban para sa prem­yong $150,000.