RMSC, handa nang buksan sa publiko

MANILA, Philippines — Matapos ang ilang buwan ay handa nang buksan ng Philippine Sports Commission ang pasilidad sa Rizal Memorial Coliseum na gagamitin para sa darating na 30th Southeast Asian Games sa Nobyembre.

Sinabi ni PSC chairman at Chef De Mission William ‘Butch’ Ramirez na nasa takdang oras ang rehabilitasyon sa mga venues sa loob ng RMSC sa Vito Cruz, Manila.

Kabilang dito ang Ninoy Aquino Stadium, track and field at football field at ang maalamat na Rizal Memorial Coliseum.

Plano ng PSC na buksan para sa publiko ang RMSC sa Oktubre 31.

“We’re on the right track as far as the completion of Rizal Memorial Coliseum and other venues are concern,” wika ni Ramirez.

Sinimulan ang pagpapaayos sa nasabing 84-anyos na pasilidad na kabilang sa lugar na protektado ng National Historical Commission noong Hulyo.

Ang pondong P842 milyon na ginamit ng PSC ay nagmula sa Philippine Amusement and Gaming Corporation (PAGCOR).

Kabilang sa mga events sa 2019 SEA Games na gagawin sa RMSC ay ang gymnastics at taekwondo.

Nakatakda ang biennial event sa Nobyembre 30 hanggang Disyembre 11.