Warriors tuyo ikatulong daog

CEBU, Philippines —  Ang University of San Carlos (USC) Warriors naglaraw nga motali sa ikatulo nilang daog sa dihang ilang sangkaon ang Cebu Institute of Technology-University (CIT-U) Wildcats sa 19th Cebu Schools Athletic Foundation, Inc. (CESAFI) basketball tournament karong adlawa diha sa Cebu Coliseum.

Bitbit ang 2-1 nga baraha, ang Warriors nagsolo karon sa ikaduhang dapit sa seniors division standings nga temporaryong gidominar sa Southwestern University (SWU)-Phinma Cobras nga wala pa'y pilde sa duha ka duwa.

Human giablihan ang ilang kampanya pinaagi sa pagpaluhod sa University of Southern Philippine Foundation (USPF) Panthers, 85-80, ang Warriors nasugamak sa mga kamot sa three-time defending champion University of the Visayas (UV) Green Lancers, 53-74.

Dali ra hinuon nga nakabarog ang Warriors human gipiog sa University of San Jose-Recoletos (USJ-R) Jaguars, 62-55 niadtong Sabado.

Samtang nindot ang sugod sa Warriors, ang Wildcats nagpangagot nga makabawi sa 67-72 nga kaparotan nga ilang nahiaguman sa mga kamot sa Jaguars niadtong Agosto 31.

Sa dili pa mag-abot ang Warriors ug ang Wildcats sa alas-6:45 sa gabii, ang CIT-U Wildkittens ug Cebu Eastern College (CEC) Dragons parehong nagtinguha nga makasagunson og duha ka daog, apan usa kanila ang mahagba gumikan kay sila man maoy magpinaksitay sa pasiunang duwa sa alas-5:15 sa hapon.

Ang Wildkittens misikad sa ilang kampanya pinaagi sa kulbahinam nga daog batok sa SWU-Phinma Baby Cobras, 68-66, samtang ang Dragons mihaw-as gikan sa 68-60 nga pagpakaging sa University of Cebu Lapu-Lapu and Mandaue Campus.