ABCC Inter-Brokerage Cup 2019 sugdan na

CEBU, Philippines —  Katorse ka teams ang mopakita og aksiyon sa Aduana Basketball Club Cebu (ABCC) Season 2 Inter-Brokerage Cup 2019 nga sugdan karong adlawa diha sa Cebu Port Authority (CPA) gym sa north reclamation area.

Sa dili pa ang duha ka duwa nga determinahon pinaagi sa bunot-bunot, usa ka simpleng seremonyas sa pagbukas ang ipahigayon sa alas-6 sa gabii. 

Molamas sa maong kalihukan mao ang pagpili sa 'best in uniform' ug 'best muse.' Ang modaog makadawat og P5,000 matag usa.

Ang partisipanteng koponan gibahin sa duha ka brackets.

Nagtapok sa bracket A mao ang Avenido Customs Brokerage, Expressway Logistics & Brokerage Corp., Portmen, I&R Alin Logistics Int'l. Corp., Rollway/Abay-Abay, Grancho Customs Brokerage ug HOV-Martines.

Sa bracket B nagpundok ang Quickserver, Alin Customs Brokerage, MP/Alburo Customs Brokerage, SMS  Customs Brokerage, Rongcales Customs Brokerage, Cutarra Customs Brokerage ug ang Alas Customs Brokerage.

Moduwa sila ubos sa single round robin format sa elimination. Ang top 4 teams matag bracket moabante sa crossover quarterfinals diin ang no. 1 ug no. 2 makabaton og 'twice-to-beat' advantage.    

Ang no. 1 sa bracket A moharong sa no. 4 sa bracket B ug ang no. 2 sa bracket A mosangka sa no. 3 sa bracket B. 

Mao sab sa bracket B diin ang no. 1 mobatok sa no. 4 sa bracket A ug ang no. 2 mohamag sa no. 3 sa bracket A.

Ang palarang mga mananaog moduwa sa knockout semifinals diin ang mopatigbabaw maoy magtigi sa kampiyonato, samtang ang mga pildero mag-ilog alang sa ikatulong puwesto.