Spain bag-ong hari sa World Cup

CEBU, Philippines —  Bag-o na ang hari sa  basketbol sa kalibotan human ang Spain midaog  pinaagi sa paglubong sa Argentina, 95-75 aron pagsakmit sa FIBA  World Cup trophy niadtong Domingo sa gabii didto sa China.

  Dako kining kalampusan alang sa Spain human sa ilang makauuwaw nga performance sa miaging 2014 World Cup diin sila ang host. Sa maong edisyon, ang Spain kutob ra intawon sa quarterfinals.

Apan gibawi kini nila karon tungod kay nalangkat nila ang World Cup trophy nga walay pilde sa tibuok torneyo.

Kini ang ikaduhang World Cup title sa Spain sukad niadtong tuig 2006 nga niadtong higayona gipangulohan ni Pau Gasol.

Karon, ang manghod  na sab niya nga si Marc Gasol ang mibida sa Espanya.

Ang three-time All-Star nga si Marc Gasol mihimo sab og kasaysayan nga maoy ikaduhang player  nga midaog og NBA title ug World Cup championship sa susamang tuig.

Niadtong Hunyo, si Gasol midaog og NBA ring human ang Toronto Raptors mipukan sa Golden State Warriors sa NBA Finals.

Labaw lang og siyete puntos ang Spain paingon sa second quarter sa iskor nga 21-14 ug ila pa kining giinat ngadto sa 43-31 sa halftime.

Gawas ni Gasol, nahimong mahinungdanong player sa kampanya sa Spain si Phoenix Suns point guard Ricky Rubio nga mihipos og 20 puntos nga usa sa nakatabang pagbingat og maayo sa ilang labaw atol sa fourth period. Ang veteran NBA guard nga si Rubio  mao sab ang gibayaw nga tournament MVP.

Sa ilang bahin, mapasigarbuhon gihapon ang Argentina sa  ilang kapildihan nga  nakaabot sila sa finals nga walay bisan usa ka aktibong NBA players nga nasagol sa ilang line-up.  

Nangulo sa Argentina si Gabriel Deck nga mipatuasik og 24 puntos, samtang ang kanhi Houston Rockets bigman Luis Scola igo lang nakakuha og otso puntos.

Angay hinuon nga maglipay si Scola kay naapil siya sa Mythical Five uban sila si Rubio, Evan Fournier sa France, Bogdan Bogdanovic sa Serbia ug Gasol sa Spain.