Sykes 7-0 na, Tech Mahindra gimasaker ang CTC-BPO
CEBU, Philippines — Sila si Victor Rabat ug Jan Auditor maoy milugwa nga mga bida sa dihang gibuntog sa Sykes Pioneers ang Fusion BPO Dragons, 73-65, aron pagpabiling way pilde sa Elite Classic sa Tanduay CSCC Athletics E-Leagues for Basketball Season 15 niadtong Sabado didto sa City Sports Club-Cebu gym.
Si Rabat mipupo og 17 puntos, tulo ka assists, duha ka rebounds ug duha ka steals samtang si Auditor mitali og 15 puntos, 10 ka rebounds, unom ka assists ug tulo ka steals alang sa Pioneers nga padayong naghari sa liderato bitbit ang 7-0 perpektong record.
Sa uban pang mga duwa sa Elite Classic, ang Accenture Sharks mitukob sa Wipro Tigers, 68-60, samtang ang Dreamscape Lions misawilik sa Teleperformance Vipers, 80-74.
Si Aldene Batino mihipos og 15 puntos ug 10 ka rebounds samtang sila Jeanne Paolo Perez ug Sherwin Resilla nagkumboya og 23 puntos alang sa Sharks nga nagpabilin sa ikaduhang dapit sa liderato uban ang 7-1 nga baraha.
Wala sab magpabitin si Ralph Belarmino nga mipabuto og 29 puntos uban ang 17 ka rebounds, upat ka ssists ug tulo ka steals ug ingon man si Matthew Oche nga mitali og 15 puntos, 18 ka rebounds ug tulo ka assists alang sa Lions nga nagkupot na karon og 3-4 nga marka.
Sa EVO League, ang Tech Mahindra Tech Mighties way bisan gamay nga kaluoy nga gipakita sa gihimo niining pagmasaker
sa CTC-BPO Trojans, 99-35, aron inaton ang ilang record ngadto sa 6-1.
Labaw nang daan og 36 puntos sa halftime, 49-13, gitiwasan pa sa Tech Mighties ang Trojans sa nahibiling duha ka kuwarter dayon na sa pagposte niini og makalisang nga 64 puntos nga demolisyon.
Sa uban pang mga duwa, ang Concentrix Converters (4-4) mibuntog sa QBE Generals (0-5), 75-57, samtang ang Fluor Pandas (4-3) mipiog sa Optum Knights (5-2), 71-61.
- Latest
