PSC kaisa ng atleta sa SEAG overall title bid

MANILA, Philippines — Nangako si Chef de Mission William “Butch” Ramirez na kasangga ng atleta ang Philippine Sports Commission sa tangkang masungkit ang overall title sa 2019 Southeast Asian Games na idaraos sa Nobyembre 30 hanggang Disyembre 11 sa bansa.

Ito ang tiniyak ni Ramirez kung saan susuportahan nito ang lahat ng pangangailangan ng mga atleta para masiguro ang matagumpay na kampanya ng Pilipinas sa naturang biennial meet.

Sinabi ni Ramirez na bukas ang kanyang opisina para sa anumang problemang makakaharap ng mga national sports associations at sinigurong agad itong sosolusyunan.

Nakipagpulong kahapon si Ramirez sa mga National Sports Association (NSA) presidents, secretary-generals at competition managers sa PICC para tiyakin ang solidong suporta ng PSC.

“Tell us your problems and let’s get them solutions. Let’s resolve all issues today and make sure we smoothly host the games,” ani Ramirez.

Kasama ni Ramirez sina Philippine Olympic Committee President Abraham Tolentino at Chairman Steve Hontiveros, PSC Commissioners Charles Maxey at Celia Kiram, Deputy Chef de Mission Stephen Fernandez at Philippine SEA Games Organizing Committee Executive Director Tom Carrasco.

Ipinagmalaki ni Phisgoc Chairman at House Speaker Alan Peter Ca­yetano ang pagkakaisa ng PSC, POC at Phisgoc na malaking tulong para sa ikatatagumpay ng SEA Games.

Pinaplantsa na ng Phisgoc ang ticketing, accommodation, venues, transportation at logistics gayundin ang pagsasaayos sa ilan pang venues sa weightlifting, squash, kickboxing, skateboard at obstacle sports.