Pob. Oriental, Pulpogan sud na sa semis sa Alegado Cup

CEBU, Philippines – Nakasud na sa semifinals ang Poblacion Oriental ug Pulpogan sa 10th Mayor Alegado Cup Inter-Barangay Fiesta Basketball League didto sa Consolacion.

Ang managsuong Malagar nga sila si Larry, Lemuel ug Louie nagkumbinar og 33 puntos alang sa Poblacion Oriental nga mibuntog sa Poblacion Occidental, 80-72  aron moabante sa semis sa seniors category A.

Si Pipo Flores miamot og 14 puntos  sa Poblacion Oriental nga magabaton og twice-to-beat advantage sa sunod nga hugna isip topseed sa ilang bracket.

Sa SK juniors category A, sila si John Paulo Dalumpines, Raymundo Osabel ug Picer Candido  nga pulos mga sakop sa Consolacion Sarok Weavers sa Governor's Cup, maoy mikuha sa atensiyon sa dihang gibihag sa Pulpogan ang Cabangahan, 75-72 aron pag-abante sa Final 4.

Si Dalumpines mirehistro og 25 puntos, samtang sila si Osabel ug Candido nagkumboya'g 23 puntos alang sa Pulpogan.Ang Pulpogan nimartsa sab ngadto sa midgets category A semis human nakaipsot batok sa Cabangahan, 83-79. Si Rovello Robles mipabuhagay og 38 puntos, samtang sila si Prince Arnold Soquino ug Lorenz Mission nakatigum og 21 puntos alang sa Pulpogan.