1997 Ronins, 2005 Chameleons 3-0 na's USC-NABC Mayor's Cup
CEBU, Philippines — Ang 1997 Ronins ug ang 2005 Chameleons mikulit sa ikatulo nilang sagunson nga daog aron angkonon ang temporaryong liderato sa tagsa-tagsa nila ka dibisyon sa 2019 University of San Carlos-North Alumni Basketball Conference (USC-NABC) Cebu City Mayor's Cup niadtong weekend didto sa USC North Campus gym.
Sa Division 1, ang Ronins nagpabiling wa'y tatsa human gipahilom ang 1994 Bulldogs, 79-63, ubos sa pagpangu ni Al Bughao nga mitimbre og 23 puntos.
Wala sab magpa-alkansi si Marck Campomanes nga mitali og 12 puntos, lima ka rebounds ug duha ka assists sa dihang ang Chameleons nakaipsot batok sa 2003 Stallions, 55-53 aron birahon ang liderato sa Division 2.
Nagpabilin sab nga wa'y pilde sud sa duha ka duwa ang 1986 Siargao Wave Riders, 2000 Millennium Bugs ug ang 1990 Titans.
Si Arturo Mata mikolekta og 20 puntos ug unom ka rebounds sa dihang gibugha sa Siargao Wave Riders ang nagkagidlay nga 1985 Legends, 62-37, si Vincent Enad adunay 17 puntos ug lima ka rebounds aron ituboy ang Millennium Bugs ngadto sa 56-47 nga pagpakaging sa 2001 Builders, samtang si Hector Lawas mibahog og 21 puntos, walo ka steals, lima ka assists ug tulo ka rebounds alang sa Titans, nga mipayaka sa 1987 Bros, 51-40.
- Latest
