Junior Webmasters magsugod na sa ilang depensa
CEBU, Philippines — Human sa usa ka semana nga pahulay, mobalik na ang aksiyon sa Cebu Schools Athletic Foundation, Inc. (CESAFI) Season 19 men's basketball tournament karong adlawa uban ang duha ka duwa diha sa Cebu Coliseum.
Sa pasiunang duwa sa alas-5:15 sa hapon, sugdan sa University of Cebu (UC) Junior Webmasters ang pagdepensa sa ilang korona batok sa University of the Visayas (UV) Baby Lancers sa dumot nga rematch sa juniors division finals sa miaging tuig.
Sa milabay nga season, gi-sweep sa Junior Webmasters ang Baby Lancers sa ilang best-of-three series aron langkaton ang labing una nilang kampiyonato sa CESAFI.
Sa pagpanalipod nila sa ilang trono, ang Junior Webmasters nakaangkon og dugang kusog gumikan kay ang bitoon nilang si Isaiah Blanco, anak ni kanhi PBA star Dondon Hontiveros nga usa ka mahinungdanong yawi sa makasaysayanon nilang kadaogan, nakahukom nga magpabilin sa team uban ang panghinaut nga tabangan sila pag-abante og balik sa finals.
Human sa sangka sa UC ug UV, ablihan sa UC Webmasters ni coach Yayoy Alcoseba ang ilang kampanya sa seniors division batok sa nagkalig-on nga University of Southern Philippines Foundation (USPF) Panthers sa alas- 6:45 sa gabii.
- Latest
