Cutarra makigbatok sa MJE

CEBU, Philippines — Parehong nangapilde ang defending champion Cutarra Customs Brokerage ug MJE sa ilang unang duwa, apan aduna  na   gyu'y  modaog   human sa ilang sangka   sa GJA-Dogie Cup Basketball Season 3 karong adlawa diha sa CPA gym sa Pier 6.

Ang Cutarra ni Rocel Cutarra ug ang MJE ni MJ Engracial maoy pasiunang duwa nga sugdan sa alas-12:30 sa hapon.

Sila si Dandan Enriquez ug Noel Medalle nga nagkumboya'g 32 puntos atol sa ilang 59-70 nga kapildihan sa Rongcales gipaabot nga maoy mangulo sa opensiba sa MJE.

Samtang ang Cutarra maglaum sab nilang Francis Eri, Mark Santiago ug Ecojedo.

Magbinuk-anay sab sa ilang baraha ang Rascals ug ang Thor Customs Brokerage sa main game sa alas-2:30 sa hapon.

Ang Rascals magsandig sa troika nilang Jayra Intes, Johnrey Catargena ug Takloy Moral nga parehong naka-double digits sa opening game.

Samtang ang Thor magsalig sab nilang Ronald Dungog, Jopel Paca ug Ronjay Aguilon.

Sa pagka karon, ang Rascals ni Resty Lope ug Thor ni Eric Lima aduna pa'y 1-0 nga baraha ug ang modaog mag-una sa standing.

Mao sab ang Rongcales nga tinguha sab mokulit sa ilang ikaduhang sunod-sunod nga daog  aron makabahin sa liderato.

Ang Rongcales ni Richard Rongcales moharong sa Quickserver  ni Eulo Arevalo sa ikaduhang duha sa ala-1:30 sa hapon.

Aron matuman ang pangandoy sa Rongcales, kinahanglan nga mowadwad og maayo ang ilang kuwadro alas nga naglangkob nilang Baeng Medalle, Francis Palero, Rivera ug Entero.

Ang Quickserver maghangad nilang Ryan Villomo, Jaymar Caynila ug Rex Bensi.