Tangke, Pooc mikulit kulbahinam nga daog sa Talisay Mayor's Cup
CEBU, Philippines – Ang Tangke ug Pooc parehong miposte og makapaisag balhibo nga kadaogan batok sa tagsa-tagsa nila ka mga kontra sa juniors division sa 2019 Talisay City Mayor's Inter-Barangay Basketball Tournament didto sa Talisay City Sports Complex.
Si Rodel Beduya mibahog og 13 puntos aron pangulohan ang Tangke batok sa San Roque pinaagi sa sikit nga desisyon, 55-51.
Dako sab og natampo sila si Laurencio Torniado, Eliezer Obrero, Ryan Dacua ug Jommelito Dacua nga nagkumboya og 33 puntos alang sa Tangke.
Si Dave Fernandez maoy nangu sa pilderong San Roque uban ang 14 puntos.
Sa laing duwa, sila si Rubino Singson ug Anthony Alvarez nagkumbinar og 31 puntos alang sa Pooc nga mibayo og mura'g bagyo nga mipilde sa Dumlog, 70-66.
Nalubong ang Pooc og 17 puntos sa halftime, apan miresbak sa ikatulong kuwarter, 22-14 ug dayon gisirad-an ang duwa pinaagi sa 25-12 rally aron pahagbaon ang Dumlog.
Sa kinatibuk-an, gikastigo sa Pooc ang Dumlog sa final half, 47-26.
Si Gurmel Singh mikamada og 18 puntos sa Dumlog, samtang sila si Zaldy Estimada ug John Lester nagkumboya og 22 puntos sa pilderong kawsa.
- Latest
