Thor nakaikyas sa Cutarra sa GJA-Dogie Cup Season 3;Rascals, Rongcales gisubhan sab dayon og daog

CEBU, Philippines —  Nakaikyas sa ligas kaayo nga duwa ang Thor Customs Brokerage ug igo lang kining midaog og uno punto batok sa defending champion Cutarra Customs Brokerage, 72-71 pagsugod sa GJA-Dogie Cup Basketball Season 3 niadtong Sabado didto sa CPA gym sa Pier 6, Dakbayan sa Sugbo.

Gidaog ang duwa pinaagi sa penalty shot ni Jopel Paca.

Sa kinatibuk-an, si Paca mihakot og 13 puntos, apan ang topscorer sa Thor Customs Brokerage ni Eric Lima mao si Ronald Dungog nga miariya og 16 puntos, samtang si Ronjay Aguilon mikabya og 10 puntos.

Ang nadiskohido nga Cutarra Customs Brokerage ni Rocel Cutarra gipangulohan ni Ecojedo nga mikadlit og 15 punto, gisundan ni Francis Eri sa iyang 14 puntos ug Mark Santiago nga adunay 13 puntos.

Ang Cutarra maoy naggukod pirme ug sa tanto nilang ginukod nakaigwalis kini, 66-all sa tira ni Eri sa katapusang 1:27  sa duwa. Apan si Paca nakatira og tres aron hatagan ang Thor og 69-66 nga labaw sa nahibiling 58 segundos.

Nahulga ang Thor dihang nakatabla na sab ang Cutarra, 71-all kortesiya sa 3-point play ni Eri. 

Dihang ball possession sa Thor, si Paca nakakubit og foul nga maoy naghatod kaniya ngadto sa free throw line. Usa ra ang napasud ni Paca, apan igo na kaayo kini aron mapadaog niya ang Thor.

Sa sayo pa, ang Rascals gilihian sab og daog dihang ilang gipukan ang Quickserver, 78-70 ubos sa pagpangulo ni Jayra Intes nga miposa og 21 puntos.

Laing nakakuha og double figures sa team ni   Resty Lope. mao sila si Johnrey Catargena ug Takloy Moral sa ilang 16 ug 11 puntos.

Ang Quickserver ni Eulo Arevalo gipangulohan nilang Ryan Villomo ug Jemar Caynila nga nagkumboya'g 34 puntos.

Gisugat sab og daog ang Rongcales Customs Brokerage pinaagi sa paglubong sa MJE ni MJ Engracial, 70-69.

Nagkumbinar og 29 puntos sila si Rivera ug Entero aron pangulohan ang Rongcales Customs Brokerage ni Richard Rongcales. Si Francis Palero miamot og 12 puntos, samtang si Baeng Medalle mitampo og 10 puntos.

Sila lang si Dandan Enriquez ug Noel Medalle ang miiskor og double figures sa team ni MJ Engracial sa ilang 19 ug  13 puntos.

 Puntos matag usa

Unang duwa:

RASCALS (78) – Intes 21, Catargena 16, Moral 11, Jonard 8, Monteño 6, Avenido 4, Mabangue 4, Deniela 4, Diaz 2.

    QUICKSERVER (70) –  Villomo 20, Caynila 14, Arden 9, Cal 7, Garcia 6, Geno 6, Bruce 4, Novie 2.

Ikaduhang duwa:

THOR (72) - Dungog 16, Paca 13, Aguilon 10, Yncierto 8, Raganas 6, Villano 4, Catayoc 4, Jeric 3, Bejoc 3, Villano 3, Gambe 2.

CUTARRA (71) – Ecojedo 15, Eri 14, Santiago 13, Manulat 8, Amorin 4, Arreglo 3, Batuto 3, Villasor 2.

Ikatulong duwa:

RONGCALES (70) – Rivera 17, Entero 12, Palero 12, B. Medalle 10, Villarde 4, Villacastin 3, Daculan 3, Dayon 3, Dela Cruz 2.

MJE (59) – Enriquez 19, N. Medalle 13, Oporto 7, Alejano 5, Gornez 4, Olita 4, Aragon 4, Engracial 4, Baltonado 2.