Kobe, Shaq mihimakak nga nagkasungi na sab

CEBU, Philippines – Sila  si  Kobe Bryant ug Shaquille O'Neal parehong miinsister nga nagpabilin nga maayo ang ilang relasyon bisan pa man sa labing uwahi nilang mga labtik batok sa usa'g-usa sa social media.

Ang duha nakadaog og tulo ka kampiyonato sa NBA sa dihang nag-uban pa sila sa LA Lakers, apan ang tensiyonado nilang sitwasyon maoy nasentro sa atensiyon atol sa ilang dominasyon sa liga sa miaging dekada.

Nagkauli ra hinuon ang maayong kabubut-on sa duha ka retiradong kanhi NBA superstars atol sa usa ka online podcast niadtong 2015, apan nagtuo ang uban nga lagmit moulbo og balik ang ilang panagbangi  gumikan sa pamahayag ni Bryant sa dihang nahinabi didto sa Las Vegas sud nilang bulan nga kon ugaling mas nindot pa ang work ethic ni O'Neal mamahimo unta kini nga labing banggiitan nga basketbolista sa kasaysayan.

Apan dali kining gitubag ni O'Neal sa pag-ingon nga dili ka makadawat og mga estatuwa kon dili kini nimo trabahuon og maayo.

Sama ni Bryant, si O'Neal duna sa'y monumento nga gipabarog didto sa Staples Center, ang homecourt sa Lakers.