Durham-Balkman duo ibabandera ng Meralco

MANILA, Philippines — Itatambal ng Meralco kay one-time PBA Best Import Allen Durham si dating San Miguel reinforcement Renaldo Balkman para sa kanilang kampanya sa darating na 2019 FIBA Asia Champions Cup sa Bangkok, Thailand.

Nakatakda ang nasabing torneo sa Setyembre 24-29.

Ang 6-foot-5 na si Durham ang naging import ng Bolts noong nakaraang taon katuwang si Diamond Stone.

Tumapos ang Meralco sa fourth place noong 2018 edition matapos matalo sa Korean team SK Knights sa kanilang labanan para sa bronze medal.

Maliban sa Bolts, sasabak din sa 2019 FIBA Asia Champion’s Cup ang mga PBA teams na San Miguel Beermen, Blackwater Elite at TNT Katropang Texters.

Maglalaro muna ang mga Beermen, Elite at Tropang Texters sa East Asia Super League’s The Terrific 12 sa Setyembre 17-22 sa Macau.

Gagamitin ng nasabing mga PBA squads ang nasabing dalawang international tournaments para sa 2019 PBA Governors’ Cup na didribol sa Setyembre 20.

Sa nasabing season-ending tournament ay itatampok muli ng nagdedepensang Magnolia si import Romeo Travis kasama sina Justin Brownlee (Barangay Ginebra), Eugene Phelps (Phoenix) at Olu Ashaolu (NLEX).

Ang mga bagong mukha naman ay sina Dez Wells (San Miguel), KJ McDaniels (TNT Katropa), Joel Wright (Rain or Shine), Mycal Ammons (NorthPort), Branden Dawson (Alaska) at Khapri Alston (Columbian).

Sa likod ni Travis ay tinalo ng Hotshots ang Aces, 4-2 sa kanilang championship series para makopo ang korona ng 2018 PBA Governor’s Cup.