Fajardo gumana sa endgame para isalba ang San Miguel
Laro Bukas(Smart Araneta Coliseum)
7 p.m. SMB vs TNT Katropa
MANILA, Philippines — Nang mangailangan ang San Miguel ng puntos para makalayo sa TNT Katropa sa dulo ng fourth quarter ay nagsalpak ng krusyal na inside basket si June Mar Fajardo.
Nakatulong ito sa Beermen para talunin ang Tropang Texters sa Game Four, 106-101 at itabla ang kanilang championship series sa 2019 PBA Commissioner’s Cup Finals noong Linggo.
“We’re lucky because in the endgame, we were able to hold our four-point lead. We’re able to knock those shots,” sabi ni head coach Leo Austria.
Tumapos ang five-time PBA MVP awarde na si Fajardo na may 22 points at 7 rebounds para itabla ang San Miguel sa 2-2 sa kanilang best-of-seven title showdown ng TNT Katropa.
“Mahirap kasing mabaon sa 1-3 so mabuti at naitabla namin ‘yung series,” sabi ng 6-foot-10 na Cebuano star center.
Babasagin ng Beermen at Tropang Texters ang kanilang pagkakatabla sa Game Five bukas sa Big Dome.
Tumapos naman si import Chris McCullough na may 27 markers at 22 boards para sa San Miguel, nakahugot kina Alex Cabagnot at Von Pessumal ng 25 at 14 points, ayon sa pagkakasunod.
Binanderahan ni Best Import Terrence Jones ang TNT Katropa mula sa kanyang 32 points, 16 rebounds, 6 assists at 6 steals habang may 17 markers, 8 boards at 8 assists si Best Player of the Conference Jayson Castro.
“For us to win, dapat hindi kami naghahabol. Dapat nandoon lang kami,” sabi ni Castro, nakamit ang kanyang pang-limang BPC trophy para makatabla sa ikalawang puwesto si two-time PBA MVP Danny Ildefonso sa likod ng walo ni Fajardo.
- Latest
