Canillas sud dayon sa finals, Petracorta may paglagum pa

CEBU, Philippines — Miabante dayon sa finals ang Canillas Customs Brokerage, samtang may paglaum pa ang Petracorta Customs Brokerage human midaog batok sa managlahi nilang kaatbang sa Cebu Aduana Basketball Legends (CABL) Season 2 niadtong Sabado didto sa Basak gym, Dakbayan sa Sugbo.

Sulagma kaayo nga ang Canillas Customs Brokerage ni Roy Canillas ug Petracorta Customs Brokerage ni Mayor Melchor Petracorta parehong miiskor og 84-77 nga kadaogan nga maoy labing unang higayon sa kasamtangang liga.

Nagmangtas si Noel Medalle ug maoy responsabli pagpa-abante sa Canillas ngadto sa finals.

Si Medalle mitusak og 17 puntos aron mangu sa tulo ka Canillas players nga miiskor og double figures.

Ang 'twice-to-beat' nga Canillas mitagak dayon sa Jam Customs Brokerage ni Primitivo Mondin, 84-77.

Sila si Rex Bensin ug Marvin Sillar nagkumboya'g 24 puntos sa Canillas nga maoy nikontrol sa tibuok duwa.

Ang natagak nga Jam gipangulohan ni Jaymar Elloren  nga mirehistro og 19 puntos, gisundan ni Mark Rodriguez nga mitali og 11 puntos.

Sa ilang bahin, ang Petracorta aduna pa'y purohan nga makaduwa sa finals human gibihag ang 'twice-to-beat' nga Portmen, 84-77.

Sa gihapon, sila si Francis Palero ug Reyden Villaronza ang nangulo sa balanseng opensa sa Petracorta nga parehong mibagnos og 13 puntos, samtang si Toni Largosa miambit og 10 puntos.

Nangulo sa pilderong Portmen mao silang James Jordan ug Niel Villacampa nga mihakot og 14 puntos matag usa.

Si Reggie Regidor mitampo'g 12 puntos ug si Shun Cal miamot og 10 puntos sa Portmen ni Boodee Monteño nga tinguhang mobawos sa Petracorta sa tagakay nilang duwa aron ilang maangkon  ang katapusang luna sa finals.

Ang modaog adunay katungod nga moharong sa nagpaabot nga Canillas sa knockout finals ning maong liga nga gidumala nilang Janno Boniao, Noel Medalle, Ferdinand Sigue, Sidney Ganapin ug Jun Gayo ingon man ni Roy Canillas isip consultant.

Puntos matag usa

Unang duwa:

PETRACORTA (84) –  Palero 13, Villaronza 13, Largosa 10, Nadal 7, Sagarino 7, Villacastin 7, Petracorta 6, Agustinez 6, Batuto 5, Mabangue 5, Petracorta 3, Petracorta 2.

PORTMEN (77) – Jordan 14, Villacampa 14, Regidor 12, Cal 10, Monteño  9, Dabon 6, Caburnay 4, Embrado 3, Bacalla 3, Bejoc 2.

Ikaduhang duwa:

CANILLAS (84) – N. Medalle 17, Bensi 14, Sillar 10, Gambe 6, Ciabo 5, Marata 4, Bukiron 4, Cabanada 4, Dela Cerna 3, Belarmino 3, Banzon 2, Boniao 2, Sigue 2.

JAM (77) – Elloren 19, Rodriguez 11, B. Medalle 9, Jovani 8, Labana 8, Jovita 6, Avenido 6, Mondin 4, Taladua , Diano 2, Cañete 1. (BANAT NEWS)