Alvarez gihuboan sa iyang IBF belt
CEBU, Philippines — Gihuboan sa iyang International Boxing Federation middleweight belt ang Mexican ring superstar nga si Saul 'Canelo' Alvarez tungod kay wala nagkasinabot ang duha ka kampo sa negosasyon alang sa sunod sangka niini.
Si Alvarez gimandoan sa IBF nga modepensa sa iyang bakus batok ni Sergiy Derevyachenko, apan wala maluto ang negosasyon sa matag kampo hinungdan nga napugos ang IBF pagkuha sa bakus.
Ang IBF misabot sa kapila ka higayon nga mibalibad si Alvarez pagdepensa sa iyang titulo, apan wala na sila kahatag pa og lugway kagahapon human sa laing pagbalibad sa kampo sa Mehikano.
Misuway hinuon paghangyo ang Golden Boy Promotion ni Oscar Dela Hoya sa IBF, apan pakyas sila pagkumbinsir sa maong boxing organization.
Bisan pa sa gibuhat sa IBF, si Alvarez nagkupot gihapon og mga world titles tungod kay siya ang kampiyon sa WBA ug WBC nga iyang nadaog niadtong miaging tuig atol sa ilang superfight ni Gennady Golovkin.
- Latest