San Miguel Beermen di mokompiyansa
CEBU, Philippines – Daghan ang misyagit og ‘sweep’, apan si San Miguel Beermen coach Leo Austria miingon nga dili sila mokompiyansa bisan pa og labaw sila og 2-0 sa ilang best-of-five semis series batok Rain or Shine Elasto Painters.
Ang San Miguel may kahigayunan nga musud sa ikaduha nilang sunod-sunod nga finals sa season kung mudaog sila sa Game 3 karong gabii didto sa Smart Araneta Coliseum.
Ang multi-titled nga Beermen mipakita sa ilang kabangis human sila miduol sa laing finals appearance dihang ilang gilubong ang Painters, 117-105, niadtong Lunes sa Game 2 sa Final 4 sa PBA Commissioner’s Cup.
Laing kasaysayan na usab ang nagpaabot sa San Miguel tungod kay kung mudaog sa serye, masakmit nila ang PBA record nga 42nd PBA finals appearance.
Hinuon si Austria mitambag sa iyang mga batas nga magmatngon tungod kay segurado nga kusug ang pagbalik sa Rain or Shine karong gabii.
“If we play our best, I think it’s hard for them to beat us,” matud pa ni Austria sa PBA.com.
Di gusto si Austria nga mausab ang nahitabo sa Game 2 diin gibiyaan sila sa Rain or Shine og 19 puntos, 21-40, sa wala pa sila mihimo og bangis nga rally sa second half.
Sama sa miaging duha ka duwa sa serye, ang San Miguel musandig nilang import Chris McCullough, Arwind Santos, Junemar Fajardo ug Chris Ross kinsa mirehistro og 34 puntos sa miaging duwa.
- Latest
