Mayweather posible mo-away pa og balik

CEBU, Philippines – Hagbay rang mipadayag si Floyd Mayweather, Jr. nga kuntento ug malipayon na kaayo siya karon sa iyang estado isip usa ka retiradong boksidor. Apan dili pa lamang dugay, nausab ang timplada sa panultihon ni Mayweather.

Daw sa mihatag pa gani siya og indikasyon nga gusto pa niyang mo-away og balik.

Sa dihang gi-interbyu human sa away sa iyang boksingero nga si Gervonta Davis nga mikastigo ni Ricardo Nunez niadtong Dominggo didto sa Baltimore, si Mayweather gisukna kon duna pa ba siya’y plano nga mosidlak og balik ibabaw sa ring.

“We don’t know … only time will tell,” tubag pa ni Mayweather.

Ang labing uwahing pamahayag ni Mayweather daw sa nag-abli sa posibilidad sa gihandum nga rematch nilang Manny Pacquiao.

Gani daghan ang nagtoo nga ang pagbinirahay nila sa social media ning bag-ohay pa lamang ilang gituyo aron pulsohan kon intersado pa ba ang ilang fans nga magsangka sila og usab.