Painters, Beermen sugod na sa ilang semis series
CEBU, Philippines – Taas ang kompiyansa ni coach Caloy Garcia ug tibuok Rain or Shine Elasto Painters nga sila ang mopalagpot sa gikahadlokang San Miguel Beermen pagsugod sa ilang "best-of-five" semifinals series sa PBA Commissioner's Cup karong gabii didto sa Smart Araneta Coliseum.
Ang duwa sugdan sa alas-6:30 sa gabii.
Ang Rain or Shine maoy katapusang koponan nga miabante sa semifinals human nila mapukan ang third seed nga Blackwater Elite niadtong Huwebes sa iskor nga 85-83.
Si Garcia nagkanayon nga sa ilang kadaogan batok sa lig-ong Blackwater, napakita sa iyang koponan nga angay silang isipon nga usa ka title contender, apan miangkon usab siya nga usa ka lisud nga tahas ang pagpukan sa San Miguel.
Sama sa ilang serye batok Elite, ang Painters mosandig sa opensa nila ni Javee Mocon, Beau Belga, Gabe Norwood ug import nga si Clint Montgomery.
Si Montogomery nga usa lang ka replacement import sa Painters human ma-injured ang veteran nga si Denzel Bowles, andam makig-atbang sa dekalibreng import sa Beermen nga si ex-NBA standout Chris McCullough.
- Latest