Simmons pabilin sa Sixers

CEBU, Philippines — Ang Philadelphia 76ers ug Australian star guard nga si Ben Simmons nagkauyon sa lima ka tuig nga maximum contract extension nga balor og $170 million. 

Kini nagpasabot nga si Simmons magpabilin sa poder sa Sixers hangtod sa tuig 2025.

Segun sa taho sa ESPN nga ang ahente ni Simmons nga si Rich Paul maoy mikompirma sa maong kasabotan. Hinuon, ang duha ka kampo duna pa'y hangtod karong Oktubre aron ipinalisar ang paglugway sa rookie contract ni Simmons.

Ang 22-anyos nga si Simmons maoy No.1 overall pick sa 2016 NBA Draft. Wala siya makaduwa sa 2016-2017 season gumikan sa injury, apan  maoy   "Rookie of the Year" niadtong 2017-2018 season.

Mi-average siya og 16.9 points, 8.8 rebounds ug 7.7 assists sa 76ers sa miaging season diin siya nalakip sa All-Star sa labing unang higayon.

Sa miaging duha tuig, mikadlit siya og 22 ka triple-doubles ug 80 ka double-doubles timaan sa iyang pagkahait sa bisan unsang aspeto sa duwa.

Gawas ni Simmons, duna pa'y laing tulo ka bitoon ang Sixers nga sila si Joel Embiid, Tobias Harris ug Al Horford. Sila maoy moabag sa misyon sa Sixers paglangkat sa labing una nilang NBA title sukad niadtong 1983.

Sa miaging season, ang Sixers natagak sa Eastern Conference semifinals sa ikaduhang sunod-sunod nga higayon.