Amir Khan dapig ni Pacquiao

CEBU, Philippines — Si British boxing star Amir Khan midapig ni Manny Pacquiao nga modaog batok sa wa'y pildeng si Keith Thurman sa ilang WBA unified welterweight title fight usa ka semana gikan karon didto sa MGM Grand Garden Arena sa Las Vegas, Nevada.

Mismo si Khan nasayod kon unsay kapasidad ni Pacquiao gumikan kay iya mang naka-sparring ang Pinoy'ng kampiyon sa dihang silang duha nagpasilong pa sa landong sa Wild Card Gym didto sa Los Angeles ubos sa paggiya ni Hall of Fame trainer Freddie Roach.

Nagkanayon si Khan nga bisan og mas bata pa si Thurman, nagpabilin gihapon ang kaabtik ni Pacquiao ug inubanan sa halapad niining kasinatian hayan nga molugwa kini nga madaugon batok sa Amerikano niining karibal.

"So the Pacquiao-Thurman fight, I think I favour more towards Pacquiao," segun pa ni Khan ngadto sa ITV Boxing. "Because Pacquiao has fought better opposition, he's got the speed and the movement."

Midugang si Khan nga si Thurman dunay kusog aron mapasakitan si Pacquiao, apan wala sa iyang huna-huna nga molampos kini pagbuntog sa bugtong eight-division world champion sa kasaysayan sa boksing.

Si Khan usa sa mga boksidor nga naglungot-lungot makasangka si Pacquiao ibabaw sa ring.

Apan aron matuman ang iyang gihandum, kinahanglan una nga dispatsahon ni Pacquiao si Thurman karong Hulyo 21.