Petron may misyon sa Sta. Lucia Realty
Laro Ngayon(Alonte Sports Center)
4 p.m. Marinerang Pilipina vs Cignal
6 p.m. Sta. Lucia vs Petron
MANILA, Philippines — Target ng nagdedepensang Petron na magarbong tapusin ang first round ng eliminasyon sa pagsagupa nito sa Sta. Lucia Realty sa pagpapatuloy ng 2019 Philippine Superliga All-Filipino Conference sa Alonte Sports Arena sa Biñan, Laguna.
Nakatakda ang bakbakan ng Blaze Spikers at Lady Realtors sa alas-6 ng gabi habang maghaharap naman ang Marinerang Pilipina at Cignal sa unang laro sa alas-4.
Nasa ikalawang puwesto ang Petron taglay ang 5-1 baraha sa ilalim ng nangungunang F2 Logistics na may malinis na 7-0 marka.
Aminado si Petron head coach Shaq Delos Santos na nasa “struggling stage” pa ang kanyang bataan.
Kaya naman umaasa itong magkaroon ng matikas na pagtatapos sa first round para madala ito sa susunod na yugto ng torneo.
Sasandalan ng Blaze Spikers sina Frances Molina, Aiza Maizo-Pontillas, Mika Reyes, Bernadeth Pons, Rem Palma, Rhea Dimaculangan, Buding Duremdes at Sisi Rondina para makuha ang ikaanim na panalo.
Sa kabila ng sunud-sunod na kabiguang tinamo, optimistiko pa rin ang Lady Realtors.
Matapos maitarak ang opening-game win, nagtamo ang Sta. Lucia ng limang sunod na talo para malugmok sa ilalim ng standings.
Umaasa si Sta. Lucia head coach Babes Castillo na muling puputok si ace spiker MJ Phillips.
Pero kailangan ding bumanat ng husto nina Pam Lastimosa, Amanda Villanueva, Rachel Austero at playmaker Rebecca Rivera para makasabay sa mataas na intensidad na laro ng Blaze Spikers.
- Latest