Marvel heroes milumpag sa CCT Builders sa LBA Friendship Cup 2019
CEBU, Philippines – Mihimo og kasikas si Juksan ilabi na sa fourth quarter diin mipaksit kini og 15 sa iyang 29 puntos aron pangulohan ang Marvel Heroes paglumpag sa CCT Builders, 87-76 sa ikaduhang hugna sa eliminasyon sa Lamac Basketball Association (LBA) Friendship Cup 2019 niadtong Sabado didto sa Lamac gym sa Consolacion.
Sa maong kadaogan, nailog sa Marvel Heroes ni Roger Lagozar ang ikaduhang dapit sa standing bitbit ang 3-3 nga baraha. Laing tulo ka players ang miiskor sab og double figures alang sa Marvel Heroes nga sa pagsugod pa lang mipakita dayon sa ilang kabangis aron moposte og 21-7 nga bentaha human sa unang 10 minutos sa duwa.
Wala pa matagbaw, giinat og maayo sa Marvel Heroes ang ilang labaw ngadto sa 20 puntos, 42-22 sa halftime.
Medyo nakabawi-bawi ang CCT Builders sa third period dihang ilang na-outscored ang Marvel Heroes, 33-18 aron makan-an ang labaw ngadto na lang sa singko puntos human sa tulo ka kuwarter, 60-55.
Ang CCT Builders misuway unta og kawat sa daog, apan bisan giunsa nila og gukod wala gyud mosalir ang ilang mga paningkamot.
Si Richard Madrid maoy topscorer sa CCT Builders nga miugbok og 23 puntos. Ikaduhang topscorer mao si Jay Abella nga adunay 18 puntos, gisundan ni Manuel Rosales sa iyang 15 puntos.
Napilde man tuod, apan ang CCT ni Engr. Chucho Tan pabilin gihapon nga nag-una sa standing sa ilang 4-2 record.
Sa laing aksiyon, ang Avengers mikulit sa ilang ikatulong daog human gipilde ang Mobile Legends, 84-75.
Gipangulohan ni Jun Monreal ang Avengers nga mipaksit og 24 puntos.
Ang team manager nga si Dr. Jun Borces mitampo og 15 puntos sa iyang koponan, samtang si Dario Casiao miamot og 10 puntos.
Sa maong kadaogan, ang Avengers nakamugna og triple-tie sa ikatulong dapit uban sa ilang biktima nga Mobile Legends ni Tata Pellejera ug Dota 2 ni Junax Ermac sa managsama nilang baraha nga 3-4 ning maong torneyo nga giorganisar sa presidente niining si Roy Ermac.
Ang liga ubos sa superbisyon ni Gene Pellejera.
PUNTOS MATAG USA
Unang duwa:
MARVEL Heroes (87) – Juksan 29, Joseph 17, Roger 10, Lagozar 10, Ruben 7, Tatay 6, Fredo 4.
CCT Builders (76) – Madrid 23, Jay 18, Rosales 15, Palero 9, Chavez 6, Chucho 5.
Ikaduhang duwa:
AVENGERS (84) – Monreal 24, Borces 15, Dario 10, Bryan 8, Ramse 5, Joefil 5, Wowe 5, Roso 3, Dence 2, Jessie 1.
MOBILE Legends (75) – Edward 23, Coach 20, Atan 8, Tanong 8, Jerry 6, Alex 6, Andoy 4, Monares 2.
- Latest