Durant, Irving opisyal nang sakop sa Nets

CEBU, Philippines — Ang duha ka NBA superstars nga sila si Kevin Durant ug Kyrie Irving  mipirma na og kontrata uban sa Brooklyn Nets kagahapon.

Kini nagpasabot nga hitsas na ang buot tukoron nga 'superteam' sa Nets nga nagpalibot nilang Durant, Irving ug DeAndre Jordan nga nakapirma na sa Brooklyn niadtong Domingo.

Si Durant gikatakda nga modawat og $141 million sud sa upat ka tuig uban sa Nets. Dili pa hinuon makaduwa ang two-time Finals MVP sunod season human maoperahi aron ayuhon ang nayayay niining Achilles tendon.

Samtang wala si Durant, ang presensiya ni Irving wa'y duda nga makapalig-on nang daan sa puwersa sa Nets sa sunod nga NBA season.

Ang 27-anyos nga si Irving mi-average og 23.8 points ug career highs 5.0 rebounds, 6.9 assists ug 1.5 steals sud sa 67 ka duwa uban sa Boston Celtics sa miaging season.

Gitabangan ni Irving ang Cleveland Cavaliers nga makampiyon sa NBA niadtong 2016 ug sakop siya sa US team nga naka-gold medal sa 2016 Rio Olympics didto sa Brazil.

Sud sa walo ka seasons uban sa Boston ug Cleveland, si Irving mi-average og 22.2 points, 3.6 rebounds, 5.7 assists ug 1.3 steals sud sa 508 ka duwa. (BANAT NEWS)