Leonard, George nasikwat ng Clippers

LOS ANGELES--Nakamit ng Clippers ang grand prize sa free agency market.

Ito ay matapos na makuha si superstar forward Kawhi Leonard ng Clippers makaraang tulungan ang Toronto Raptors sa pagsakmal sa kauna-unahan nilang NBA championship.

Bukod sa 28-anyos na si Leonard, maglalaro rin para sa Clippers si Paul George.

Para makuha ang All-Star forward ay ibinigay ng Clippers sa Oklahoma City Thunder ang apat na unprotected first-round picks, isang protected first-round pick at dalawang pick swaps.

Nakuha ng Raptors sina Leonard at Danny Green kapalit nina franchise icon DeMar DeRozan, Jakob Poeltl at isang protected first-round pick sa San Antonio Spurs.

Dahil sa kanyang right quadricep injury ay nakita lamang si Leonard sa siyam na laro para sa Spurs.

Sa kanyang paglalaro para sa Toronto sa regular season ay nagposte si Leonard ng mga averages na 26.6 points, 7.3 rebounds, 3.3 assists at 1.8 steals sa 60 games.

Pinaganda pa niya ito sa postseason sa kanyang mga kinakamadang 30.5 points, 9.1 rebounds at 3.9 assist per game.

Tinapos ni Leonard ang postseason na may kabuuang 732 points, ang third-highest total sa kasaysayan ng NBA Playoffs sa ilalim nina Michael Jordan (759; 1992) at LeBron James (748; 2018).

Samantala, ibinigay ng Washington si center Dwight Howard sa Memphis kapalit ni swingman C.J. Miles.