Batang Pier dumikit sa bonus
Lusot sa Dyip
MANILA, Philippines — Kaagad bumalikwas ang mga Batang Pier mula sa naunang pagkatalo para palakasin ang tsansa sa Top Two seats sa quarterfinal round.
Tatlong magkasunod na three-point shots ang isinalpak ni guard Nico Elorde habang kinana ni rookie Robert Bolick ang isang lay-up sa huling 2.8 segundo para tulungan ang NorthPort sa 110-108 panalo laban sa Columbian sa 2019 PBA Commissioner’s Cup kahapon sa Smart Araneta Coliseum.
Inilista ng Batang Pier ang kanilang pang-walong panalo sa 10 laro para makalapit sa isa sa dalawang ‘twice-to-beat’ incentive sa eight-team quarterfinals.
“Siguro ‘yung last two minutes na iyon, puso lang talaga,” ani Elorde, tumapos na may 14 points, 7 rebounds, 6 assists at 3 steals. “Gusto talaga naming makuha ‘yung panalo.”
Ganap nang makakamit ng NorthPort, nakahugot kay import Prince Ibeh ng 17 markers, 15 boards at 6 blocks, ang nasabing bonus kung mananalo laban sa Meralco sa susunod na Biyernes.
Ilang beses nag-agawan sa bentahe ang dalawang koponan bago nagsalpak si Elorde ng tatlong magkasunod na triples para sa 108-103-kalamangan ng Batang Pier sa huling 2:11 minuto ng fourth period.
Ang tres ni Rashwan McCarthy at tip-in ni No. 1 overall pick CJ Perez sa nalalabing 8.1 segundo ang nagtabla sa Dyip, nagmula sa 134-132 overtime win laban sa San Miguel Beermen, sa 108-108.
Natawagan naman si Columbian import Lester Prosper ng goal-tending violation nang guluhin ang lay-up ni Bolick sa huling 2.8 segundo.
Samantala, hinugot ng San Miguel si import Chris McCullough, naglaro sa NBA para sa Brooklyn Nets at Washington Wizards noong 2015-2018 seasons, bilang kapalit ni one-time PBA Best Import Charles Rhodes.
- Latest