Krusyal nga duwa sa Beermen

CEBU, Philippines — Paninguhaon sa San Miguel Beermen  nga modaog sa ilang sangka batok sa Alaska Aces aron masalbar pa ilang nagkagidlay nga kampanya sa PBA Commissioner's Cup karong gabii.

Ang  All-Filipino   Cup champion wala magdahom nga mangiwit sa standing uban ang 1-3 win-loss record.

Ang Beermen ug Aces mag-abot karong alas-7 sa gabii human sa duwa tali sa TNT KaTropa ug Columbian Dyip nga sugdan sa alas-4:30 sa hapon didto sa Cuneta Astrodome.

Si San Miguel coach Leo Austria miingon nga nadismaya siya sa dagan sa kampanya sa iyang koponan ilabi na sa katapusan nilang pilde sa mga kamot sa Barangay Ginebra diin sila napilde sa overtime sa iskor nga 107-110.

Miingon si Austria  nga himsog ang iyang mga players ug salig siya nga makabalik sila, apan kinahanglan nila nga seguruon nga makuha ang daog karon aron dili mahanaw ang ilang kahigayonan nga mosud sa top three human sa elimination round.

Si Austria magsalig gihapon sa ilang import nga si Charles Rhodes nga mi-average og 30 puntos sa unang upat ka duwa, apan kinahanglan siya og suporta gikan nila ni JuneMar Fajardo, Arwind Santos ug Marcio Lassiter.

Dili sayon ilang giatubang tungod kay ang Alaska lab-as pa gikan sa sunod-sunod nga kadaogan ug naglaraw sab sila nga mapun-an  ang ilang daog.