Villanueva moaway alang sa WBC title
CEBU, Philippines — Si 'King' Arthur Villanueva sa Dakbayan sa Bacolod mohagit ni World Boxing Council bantamweight champion Nordine Oubaali sa France karong Hulyo 6 didto sa Barys Arena sa Nur-Sultan (Astana), Kazakhstan.
Ang 30-anyos nga si Villanueva (32-3-1, 18KOs) nagtabla ug ang kababayan niining si Carlo Demecillo sa miagi niyang away niadtong Nobiyembre 24 dinhi sa Sugbo.
Iyang sab nga gipakamang si Renren Tesorio sa ikapitong hugna niadtong Hunyo 9, 2018 didto sa Siyudad sa Maasin.
Nahimo siyang WBO Asia Pacific bantamweight champion human palukapaha ang Mehikanong si Juan Jimenez sa ikaupat nga hugna niadtong Mayo 28, 2016 didto sa Bacolod.
Sa ilang rematch lima ka buwan ang milabay, iya gihapon nga gipatikangkang si Jimenez sa ikaduhang hugna didto sa Carson, California.
Napilde hinuon si Villanueva batok ni Zolani Tete sa South Africa pinaagi sa unanimous decision sa ilang WBO bantamweight title bout.
Samtang ang 32-anyos nga si Oubaali (15-0, 11KOs) mibira sa korona sa WBA human midaog pinaagi sa desisyon batok sa Amerikanong si Rau’shee Warren niadtong Enero 19 ning tuiga didto sa Las Vegas. (BANAT NEWS)
- Latest
