Pogoy gumawa ng 10 tres vs Ginebra

MANILA, Philippines — Si RR Pogoy ng TNT Katropa ang naging ikaapat na PBA player na nagsalpak ng 10 three-point shots sa isang laro.

Ginawa ito ni Pogoy sa 104-96 paggupo ng Tropang Texters laban sa nagdedepensang Ginebra Gin Kings sa 2019 PBA Commissioner’s Cup noong Miyerkules sa Smart Araneta Colisuem.

Nagsalpak ang dating kamador ng FEU Tamaraws sa UAAP ng 10-of-18 shooting sa rainbow territory para tumapos na may bagong career high na 38 points.

Nakasama si Pogoy sa grupo nina PBA greats Allan Caidic at Kenneth Duremdes at San Miguel sniper Marcio Lassiter bilang mga local players na kumonekta ng 10 triples sa isang laro.

“Credit to all the players. They really played well and stayed in the game,” sabi ni TNT Katropa coach Bong Ravena.

Pinasalamatan naman ng Cebuano shooter si import Terrence Jones sa pagbibigay ng magagandang assists sa kanya.

Tumapos si Jones na may triple-double mula sa kanyang 17 points, 14 rebounds at 16 assists bukod pa ang 6 blocks.