Game fixing sa MPBL paiimbestigahan ni Manny
MANILA, Philippines — Nakikipag-ugnayan ang Maharlika Pilipinas Basketball League (MPBL) sa pangunguna ni Chief Executive at Founder Sen. Manny Pacquiao sa isang expert group para pangalagaan ang home-and-away league mula sa mga illegal gambling syndicates.
Ito’y matapos ang mga unconfirmed reports na nakarating sa MPBL Commissioner’s Office ukol sa paratang na game fixing na nangyayari sa liga sa nakaraang season.
“Gusto kong panga-lagaan ang MPBL. Gusto kong ang tao hindi niloloko. Gusto ko ang game laging competitive. Hindi yung maraming hokus-pokus. Ayaw kong niloloko natin yung sambayanang Pilipino. Wina-warningan ko lang baka pagdating ng panahon mawala na kayo na parang bula,” sabi ni boxing icon Pacquiao.
Sinabi pa ni Pacquiao na bibigyan niya ng gantimpala kung sino man ang makapagpakita ng ebidensiya tungkol sa game fixing na naka-apekto sa resulta ng laro.
“May mga grupo na tayo na expert dyan para masubaybayan ang mga players na kahina-hinala, mga taong pumapasok outside the league. Bantayan natin sila. Magtulungan na lang tayo. Kapag may nalaman tayo na information, sumbong n’yo agad sa akin, ako na bahala doon,” dagdag ng Senador na tubong Gen. Santos City.
Samantala, hinati sa dalawang divisions ang 31 koponan kabilang na ang limang expansion teams na sasabak sa Lakandula Cup na magsisimula na bukas sa MOA Arena sa Pasay City.
Nanatili pa ring malalakas ang 15-team Northern Division sa pangunguna ng Datu Cup champion San Juan Knights.
Kabilang naman sa 15-team Southern Division ang Datu Cup runner-up Davao Occidental Tigers.
- Latest