Laure sisters magsasama sa Foton Tornadoes
MANILA, Philippines — Dadalhin ni UAAP Rookie of the Year Eya Laure ang tikas niya sa kampo ng Foton Tornadoes na magtatangkang masungkit ang titulo sa 2019 Philippine Superliga All-Filipino Conference na magsisimula sa Hunyo 15.
Kinuha ng two-time Grand Prix champion Foton ang serbisyo ni Laure para higit pang mapalakas ang lineup nila.
Makakasama ni Laure ang nakatatanda niyang kapatid na si EJ.
Nauna nang nagdesisyon si EJ na magbalik-aksyon matapos ang dalawang taong pahinga bunsod ng shoulder injury.
Malaking tulong si Eya sa Tornadoes dahil kaya nitong makapagbigay ng double digits kada laro.
Isa si Laure sa top scorers sa nakalipas na UAAP Season 81 kung saan tinulungan niyang makaabot ang University of Santo Tomas sa Finals.
Subalit kinapos ang Tigresses matapos yumuko sa Ateneo de Manila University sa best-of-three championship series, 1-2.
Nagtamo si Eya ng sprain sa serye.
Ngunit tiniyak niyang nasa perpektong kundisyon na ang kanyang katawan at handang-handa na siyang makipagsabayan sa matitikas na koponan sa PSL.
Maliban kina Eya at EJ, madaragdag din sa Tornadoes sina Justin Dorog at Marianne Buitre ng University of the Philippines, at Lai Bendong ng University of the East.
Sa pagpasok ng ilang key players sa koponan, itinuturing na isa ang Foton sa mga title contenders sa kumperensiyang ito.
Nariyan sina Jaja Santiago at Dindin Santiago-Manabat na parehong naglaro sa commercial league sa Japan.
Malaki ang improvement ni Santiago na nasilayan nang maglaro ito sa huling bahagi ng Grand Prix conference.
Kasama rin sa Tornadoes sina holdovers Maika Ortiz, Mina Aganon, Shaya Adorador, Jen Reyes, Elaine Kasilag, CJ Rosario, Ivy Perez, Gyselle Sy, Iumi Yongco at Arianne Layug.
- Latest