Sotto, Edu babandera sa Gilas youth sa World Cup
MANILA, Philippines — Tatrangkuhan ng twin towers na sina Kai Sotto at AJ Edu ang 14-man pool ng Gilas Pilipinas youth squad para sa nalalapit na 2019 FIBA U19 World Cup na gaganapin sa Heraklion, Greece sa huling bahagi ng buwang ito.
Makakasama nina Sotto at Edu sina Migs Oczon, Gerry Abadiano at Dave Ildefonso ng NU, Xyrus Torres ng FEU, Bismarck Lina ng UST, Joshua Ramirez ng Letran at Geo Chiu ng Ateneo.
Magbabalik din sa Gilas Pilipinas youth-dating Batang Gilas – ang mga NU standouts din na sina Carl Tamayo at Terrence Fortea matapos hindi makalaro sa ginanap na 2018 FIBA Asia U18 Championship sa Thailand kung saan pumang-apat ang koponan upang makapasok sa World Cup para sa 19-and-under age group category.
Si James Spencer naman ng UP ang nag-iisang bagong mukha sa team.
Samantala, ang isa pang alas na gwardya na si Dalph Panopio mula sa Italy ay sa Hunyo 18 pa makakasama sa koponan sa Doha, Qatar kung saan sasali ang Gilas youth sa isang pocket tournament bago tumuloy sa Greece para sa kompetisyong gaganapin mula Hunyo 29 hanggang Hulyo 7.
Inaasahang pagkatapos ng Doha pocket tourney iaanunsyo ni Arespacochaga kasama sina Charles Tiu, Ryan Betia, JB Sison, Anton Altamirano at Goldwin Monteverde ang Final 12 ng koponan.
Ranggong ika-30 sa buong mundo, masusubok ang Gilas youth sa bigating Pool C kasama ang No.9 na Argentina, No. 15 na Greece at No.19 na Russia.
Ito ang unang pagkakataon na makakasali sa U19 World Cup ang Gilas sa loob ng 40 na taon buhat nang magtapos sa 10th place ang Pilipinas sa pangunguna nina PBA legends Hector Calma, Chito Loyzaga, Yoyoy Villamin, JB Yango at Biboy Ravanes noong 1979 sa Brazil.
- Latest
